UHUSIANO KATI YA KIMEO NA AFYA YA MTOTO

‘’Mtoto wangu anakohoa sana nimehangaika kutafuta dawa imeshindikana,jirani yangu alinipeleka mahali wakamkata mwanangu KIMEO!..Lakini tangu alipokatwa  mwanangu amekuwa mnyonge anashindwa kucheza na wenzake  na kikohozi hakijaisha’’ alisimulia mama mwenye mtoto aliyekuwa na upungufu mkubwa wa damu alipofika ofisini kwa daktari.

Madaktari hukutana na malalamiko kama haya kutoka kwa wazazi ambao kwa bahati mbaya walipotoshwa na dhana ya KIMEO..Leo tutaangalia kimeo ni nini,na je kinatakiwa kikatwe? Je kuna uhusiano wowote na afya ya mtoto?..

Kimeo(uvula) ni moja kati ya misuli laini inayotengeneza sehemu ya koo watu wengine hukiita kidaka tonge au kilimi,kumekuwa na dhana potofu ya kuwa kimeo kinaweza kuleta matatizo kwa afya ya mtoto kama

  • Kukohoa sana
  • Kutokukua vizuri kwa mtoto au kudumaa
  • Wengine wanafikiri mtoto anaweza kukimeza na kufariki
  • Kimeo kirefu huleta maambukizi kwenye mfumo wa upumuaji wa mtoto.

Zifuatazo ni hatari na madhara yanayoweza kutokea kama kimeo kitakatwa hasa kwa waganga wa kienyeji.

  • Maumivu makali maana hawatumii ganzi hii yaweza kumfanya mtoto au anayekatwa kulia sana na baadaye kukataa chakula au kushinwa kumeza chakula.
  • Kupata maambukizi mbalimbali kama ugonjwa wa UKIMWI,tetenasi,kifua kikuu,homa ya ini na magonjwa mengine mengi ya kuambukiza.
  • Kupoteza damu nyingi
  • Kifo endapo kimeo kitaangukia kwenye koo la hewa maana waganga hawana vifaa maalumu vya kukishika wanapokikata.
  • Kusababisha baadhi ya maeneo ya koo kukosa damu kwa muda mrefu hvo kupata iskemia
  • Kuharibika kwa sehemu ya juu ya koo hivo kusababisha matatizo wakati wa kuongea pia chakula na maji kutokea puani .

Ukweli ni kwamba kitaalamu hakuna uhusiano wowote kati ya kimeo na haya yanayozungumzwa mitaani,ingawa zipo sababu chache sana ambazo zinaweza kupelekea kukatwa kwa kimeo kitaalamu mfano wengine huzaliwa na kimeo kirefu kuliko kawaida,maambukizi sugu kwenye kimeo na koo lakini haya yote ni lazima yawe yamechunguzwa kwa kina na madaktari na wakajiridhisha kuwa hakuna njia nyingine ya matibabu zaidi ya kukikata hivo usikubali mwanao akakatwa kimeo wala wewe mwenywe bila kuwa umeshauriwa na daktari na huduma hiyo ifanyike hospitalini na si mahala pengine.

 

 


Fortunata Cornel DDS 4 🇹🇿

Dentist
Enterpreneur
Dog and cat lover

All author posts

Privacy Preference Center