Je, kuna madhara yoyote kwa mtoto ukijamiiana wakati wa ujauzito ?

Binadamu na baadhi ya viumbe vyenye vinasaba vinavokaribia sana kuafanana na vya binadamu kama samaki aina ya Dolphin ndio pekee wenye uwezo wa kujamiiana kwa lengo la kujifurahisha tu. Ingawa njia kuu ya kupata ujauzito ni kwa kujamiiana, maswali mengi hujitokeza iwapo kujamiiana wakati wa ujauzito kunaweza kuwa na athari kwa mtoto na hata juu ya usalama wa mimba kwa ujumla. Ukweli ni kwamba hakuna madhara yoyote yanayoweza kusababishwa na kujamiiana iwapo mimba inakua katika hali ya kawaida kiafya.

Pamoja na hayo, maswali mengine hayaepukiki. Je, kujamiiana kunaweza kusababisha mimba kutoka (Miscarriage) ?.

Hapana, mimba inaweza kutoka iwapo kuna matatizo katika ukuaji wa mtoto tumboni. Lakini kama mtoto anakua vizuri tumboni, kujamiiana hakuwezi kusababisha mimba kutoka.

Je, kujamiiana kunaweza kumdhuru mtoto akiwa tumboni ?.

Hapana, kijusi kinalindwa na mfuko wa uzazi, maji ya uzazi ambayo hunyonya mikandamizo isimfikie kijusi na hata misuli minene ya kuta za mji wa mimba. Isipokuwa kwa usalama zaidi ni vema kuepuka mikao itakayo kandamiza tumbo au ambayo itasababisha mimba kuelemea upande wa nyuma (chali) hali inayoweza kuziba mishipa mikuu ya damu inayopita kwa nyuma ya mji wa mimba.

Je, kujamiiana kunaweza kusababisha uchungu kabla ya muda wake ?.

Uchunguzi umeonesha kwamba shahawa kutoka kwa mwanaume zina kemikali zinazoitwa prostaglandins ambazo zinaweza kusisimua kuta za mji wa mimba kukaza lakini sio kwa kiwango cha kusababisha uchungu kabla ya wakati wake. Aidha, kufika kileleni kwa mwanamke kunaweza kusababisha kukaza kwa kuta za mji wa mimba ingawa kwa kiwango kidogo kisichoweza kusababisha uchungu. Isipokuwa, kwa mwanamke mwenye historia ya kupata uchungu kabla ya wakati anaweza akashauriwa na daktari wake asijihusishe na kujamiiana.

Kwa upande mwingine kuna mambo kadha wa kadha yanayoweza kumfanya daktari akashauri mwanamke asijihusishe na kujamiiana kama vile:

  • Iwapo mjamzito anavuja damu ukeni bila sababu.
  • Iwapo maji ya uzazi yanavuja.
  • Iwapo mlango wa uzazi (cervix) umefunguka kabla ya wakati.
  • Iwapo Plasenta imefunika mlango wa uzazi (Placenta previa).
  • Iwapo mjamzito ana historia ya kupata uchungu au kujifungua kabla ya wakati.
  • Iwapo mjamzito anabeba mapacha.

Vile vile, ni muhimu kumkinga mtoto aliyeko tumboni dhidi ya magonjwa yanayoweza kuambukizwa kwa njia ya kujamiiana. Pamoja na ulinzi mkali anaoupata mtoto tumboni, vijidudu vya magonjwa ya zinaa kama vile UKIMWI, Kaswende na kisonono vinaweza kupenya na kumdhuru mtoto. Ni hatari kujamiiana na mwenza wako iwapo amegundulika hivi karibuni na ugonjwa wowote wa zinaa.

Kumbuka, daktari anapokushauri usijamiiane wakati wa ujauzito, anamaanisha usijihusishe na kitu chochote kinachoweza kukusisimua kingono sio tu kuingiliana kimwili.

10 thoughts on “Je, kuna madhara yoyote kwa mtoto ukijamiiana wakati wa ujauzito ?

  1. Ni kweli kwamba kuna style za kujamiiana zikitumika sana haswa mimba ikiwa changa huweza kusababisha mimba kutoka??

    1. Hello Anne !, umeuliza swali zuri sana. Kipindi cha kubeba mimba kimegawanywa katika mihula mitatu. Katika muhula wa kwanza ambao ni ndani ya miezi mitatu ya mwanzo, hakuna mkao (style) unaoweza kutoa mimba iwapo tu ujauzito huo una afya na hauna matatizo yoyote. Vitendo hatarishi katika kipindi hiki ni kama kuingiliwa kinyume na maumbile, hali inayoweza kuhamisha maambukizi kutoka kwenye njia ya haja kubwa kwenda kwenye uke. Pia, ni hatari iwapo mwanaume atapulizia hewa ukeni wakati wa kusisimua kwa mdomo (oral sex) hali inayoweza kusababisha kuziba kwa mishipa ya damu, kitaalamu inajulikana kama air embolism.

  2. Je ni kweli mtoto anaweza kuzaliwa na uchafu(shahawa) ambazo zinamwagwa wakati wa kujamiiana kwenye macho yake,na zinaweza kusababisha upofu kwa mtoto?

    1. Hi Lilian, labda niseme nilitarajia kuulizwa hili swali kwani ni jambo linalozungumzwa sana katika jamii yetu. Hakuna ukweli wowote katika hilo kwani wakati wa ujauzito, mlango wa uzazi (cervix) hufunga kabisa na ukijumlisha na mfuko wa uzazi (amniotic sac), shahawa haziwezi kumfikia mtoto aliyeko tumboni.

      Lakini pia, shahawa sio uchafu bali ni majimaji yaliyoundwa na mbegu za kiume, protini na sukari kama chakula cha hizo mbegu.

      Hiyo hali ya mtoto kuzaliwa na uchafu machoni ni dalili za maambukizo ya magonjwa ya zinaa kama vile kisonono. Kitaalamu inaitwa “Ophthalmia Neonatorum”. Ndio maana tunashauri kwamba ni hatari kwa mama mjamzito kufanya ngono zembe au hata kama ni mwenzi wake, asiwe na maambukizi yoyote ya magonjwa ya zinaa.

    1. Hellow Halima. Asante kwa kuuliza swali zuri. Hapana, baada ya urutubishaji kutokea mimba huanza kutungwa na mayai ya kike huacha kupevushwa hivyo mimba nyingine haiwezi kutengenezwa.

    1. Hello Esma. Kuna usemi kuwa madaktari wanasoma vitabu lakini mwili wa binadamu hausomi vitabu kwa hiyo chochote kinaweza kutokea ila kwa uhakika kiasi gani ?

      Kwa kawaida mwanamke hupevusha yai moja na kuliachia kila mwezi kutoka katika moja ya ovari mbili alizonazo. Kwa hali isiyo ya kawaida wengine huweza kuachia mayai mawili kutoka katika kila ovari ndani ya mwezi huohuo mmoja. Hapo kuna uwezekano mayai hayo mawili yakarutubishwa moja baada ya lingine. Hapo itatengenezwa mimba ya mapacha wasiofanana.

      Hivyo ni vigumu kusema ni mimba mbili tofauti bali ni mimba ya mapacha wasiofanana

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.